بعتب عليك
،،،،،،،،،،،،،،،،،،،،،،،
والعتب من الوجع
على العتب قاعد
بيعد لليل الطويل القصايد
شجر الحنين فارد دراعاته
ساكن قلوب الحبايب
والوعد بينا من فينا فاته
واللى انكتب بينا
كان على الورق
صدقنى فى النهايه فرق
ركب الحب مركبه
لكن للاسف طلع مركب ورق
على شط الفراق
فى لحظه داب وغرق
وأنا لسه بعتب عليك
وشارده بين القلوب
وأنا قلبى من الوجع مغلوب
بشرب دموع الندم
وإللى أنكتب من القلب
للقلب له ألف حال
أصل إللى طالت غربته
مايوصلوش من الحبايب مرسال
رحلته جوه القلب طويله
لاتنحكى ولا تنقال
يمكن تتوه سكته
والدنيا دواره
راكبه تلال الشوق
والنفس بالحب أماره
شالى الحزين
على كتفى بردان
رسمه عليه قلبى
وقلبى على ضى القمر سهران
والحرف جوه صدرى أنكتم!
يمكن ندم ؟
شقشق الصبح
وورد الحب مافتح
ونور الشمس صحى
بدرى ماصبح
غنى الكروان
على نبض قلبى غنوته
لحنه الحزين
يسرق قلوب المشتاقين
قسمه ومكتوبه على الجبين
لكن ياقلبى تقول لمين
ذكريات العمر
عبير محمد
ليست هناك تعليقات:
إرسال تعليق