،،،،،حكاية أم،،،،،
@@@@@@@
كان ياما كان
هحكي حكاية مش ع البال
أم شقيانة طول النهار
في بيوت وأراضي وأفران
عايشة مع إبنها ومراته من زمان
بتساعد إبنها من معاش أبوه كمان
وباقي المعاش ..علاج ضغط
وسكر ...ومصروف للعيال
الأم دي عايشة عيشة مرار
وعمرها ما إشتكت بأي كلام
معاملة مرات إبنها لها
كلها مهانة وذل وإحتقار
ورغم الإهانة تعذرها عشان ضيق الحال
استحمليني يابنتي..ربنا يهون ويقصر الأيام
ولما معرفتش تطفش حماتها
إشتكت لزوجها وكمان للجيران
أنا من حقي أعيش لوحدي
أمك مضيقة عليا الدار
أنا عرفت إني حامل
ومحتاجة مكان أمك لإبني اللي جاي
راح الإبن لأمه ...وبكل حنان
تعالي ياأمي أوديكي أي مكان
بكت الأم بإنهياااار
ليه بس ... ياعبد الرحمن !!!!
دا أنا بره البيت طول النهار
وسواد الليل بفرد ضهري جنب العيال
لو كنت عاوز المكااااان
هنام ع الأرض وهوسع للعيال
وإن كنت عاوز الأرض
هسبها..وأنام في وسط الدار
وإن كنت عاوز وسط الدار
هنام ياإبني قدام البيت
ريحة أبوك بتحسسني بالأمان
وإن كنت عاوز المعاش كله
خد المعاش ...وبلاش العلاج
بس سبني في داري ياعبد الرحمن
أنا حافظة البيت ده ....
طوبة ..طوبة ..وجدار .. جدار
إستحملني ياابني...
دا أنا بعد النهاردة
هدعي ميطلعش عليا نهاااار
ياااارتني...مت...من زمااان
أنا عاوزة أطلع من هنا علي ضهري
وأتغسل هنا في وسط الدار
سامحني ياإبني ....
لو كنت طولت عليك
وكسرت أوامر المدام
بلغها إعتذاري
وقول لها تستحملني شوية كمان
العمر اللي راح ..مش أد اللي جاي
وأنا من النهاردة هخرج أنام قدام الدار
أحرسك ياإبني...أنت والعيال
ومش هأكل غير عيش وجبنة
ولو مفيش هعيش ع المية
وهصوم طول النهاااار
بس بلاش تطردني ياإبني
أنا روحي متعلقة بالبيت ده
وكل اللي في المكاااان
إنت لو مشتني من هنا
مش هستحمل ياإبني
وهموت قدامك قبل ما أطلع م الدار
صدقني ياعبد الرحمن !!!!!!
" بقلم/مها بركات"
ليست هناك تعليقات:
إرسال تعليق