عُمري بيجري
___________
آآه يا زمان الفرح يا زهري
وياك عُمري عمال يجري
فاكر لما أنا كنت صغير
كنت بقول من غير ما اتحير
لسه يا عُمر عليا أنا بدري
وأهو دلوقتي ،،،
كل شيئ حواليا اتغير
سني بيكبر
وحاسس إن العمر قصير
فيه غصة بتنبض جوايا
تقولي كفاااااية
إياك تفرح
وإياك بخيالك يوم تسرح
لتبقى حكايتك والله حكاية
وإياك تاني يا واد تتهور
انت كبرت وحظك خدته
واللي عملته
في صحيفتك مكتوب ومسطر
تقدر تنكر
إن حياتك عشتها انت
بكل إرادتك
فرحك .. حزنك
حتى سعادتك
والدنيا كانت بين إيدك
رهن إشارتك
وكل اللي قريب أوي منك
عماااال بيعَّظم ويشَّكر
قولي عملت بعمرك إيه
وايه من عملك راح تجنيه
عمرك كان لك خير وزيادة
ولا العمر ده ضاع ف التيه ؟
سااااكت ليه ؟؟؟
صعب سؤالي ؟؟
ولا جوابك مش مضمون
ولسه عليه يا حزين بتدَّور
واوعى تفكر
إن العمر هيرجع تاني
أصله أناني
أما يروح ما بيرجع تاني
تلقاك بتقول من جواك
آآآه يا زماني
يا ريتني أرجع من تاني صغير
________________________
بقلمي / محمد ربيع المصري
ليست هناك تعليقات:
إرسال تعليق