جملة مفيدة ،،،
-------------------
حد سألني ...
تفرق إيه أيام دالوقتي
عن أيام عشناها زمان
مش برضه الصُبح بييجي ف ميعاده
والشمس بتملا الأركان
مش برضه الليل بيمد سكونه
وظلامه يُعم الأكوان
واليوم برضه ساعاته معدودة
والألوان هي الألوان
والأعياد لها وقت محدد
ف الأضحى وأخر رمضان
والشتا فيها البرد بيكوي
والصيف يضرب ف المليان
يبقى الفرق ده مش موجود
والأيام هي الأيام
قولتله أيواااا
الأيام هي الأيام ...
أما الفرق ده والله كبير
أصل الفرق ده فيا وفيك
فرق النشأة والتربية
والأخلاق اللي تعليك
بص وشوف الناس حواليك
إيه أخلاقهم
إيه مبادئهم
عايشين راضيين بالمقسوم
ولا تملي ف هم وشكوى
وكل يوم يخلقوا ف هموم
يا ترى بيحبوا لبعض الخير
شوف أنت وفتح لي عينيك
وبرضه الحكم هيبقى عليك
أما زمان ...
يتلخص في جملة مفيدة
واللي أخبر عنه رسولنا
(من أصبحَ معافًى في بدنِه
آمنًا في سِربِه
عندَه قوتُ يومِه
فَكأنَّما حيزت لَهُ الدُّنيا بحذافيرِها)
**صدق رسول الله الهادي**
____________________________
بقلمي / محمد ربيع المصري
ليست هناك تعليقات:
إرسال تعليق