(حِكم و مواعظ)… للشاعر د. علي مسلم عجمي
-------------------------
بنت الأصل من كوخها بتعمل قصر
و بتعيش معها في هنا طول الدهر
و مهما عليها تكالبوا ذياب الزمان
بتبقى إلك بالشرف وحدك حصر
لا تضرب زيادة و لا تعمِّق جراح
و تنسى علاقة بالصداقة و إنشراح
بعد العداوة في صلح بين القلوب
و الوفق جايي و ساعِتا اللي راح راح
مش ورد اتخلق للشم انحسب
و لا كل خاين للشرف عالي النسب
بالدم لا ما بتنفدى كل البشر
و لا كل ناجح فشل لو مرة رَسَب
اخترت الكلام بحكي علساني الصريح
حكي صادق عن لساني مش قبيح
على لسان الحكي جاهز للكلام
المش عاجبو ينسى و لوحدو يستريح
الرخيص لا ما تعاتبو بترخص معو
من دون قيمة.نـزَّلك تا ترفعو
و إبعد عن الغشاش و الفاسد كمان
و إبن الحرام و كل حدا عم يتبعو
شو بخاف قالت هِـز غربالي
و ينسقط منو العلى القلب غالي
أصدق و حتى يظل إلفة بيننا
بحالك إنت خليك لا تدخل بحالي
بتقول سِتّي إحذر من تنين
بالأولي جاهل حفظ سطرين
و التانية رجال صابو الحظ
جوعان كسب و صار معو قرشين
اللي بيزرع حقد ما بيحصد أمان
و اللي بيزرع كره ما بيحصد حنان
و اللي بيزرع شوك ما بيحصد ورود
و اللي بيزرع قمح ما بيحصد زوان
الشاعر د. علي مسلم عجمي
لبنان
ليست هناك تعليقات:
إرسال تعليق