( سيبك من شغل السيما )
نصيحة لشباب الأيام دي :
إوعى تكون فاكر إنك
إيدك طايلة السما من فوق
لما يا واد كنت ف سنك
حققت اللي انا عايزُه بذوق
سيبك من شغل السيما
تتشقلب تمشي على الحيط
عايز يبقى لك قيمة
يبقى بلاش شغل التنطيط
إهدَى يا واد وإرسى شوية
خُد نَفَسَك وإتأنَّى كتير
أفعالك رهن النِيَّة
والنية رهن التفكير
قبل ما تبدأ مشوارك
شوف رجليك واخداك على فين
مين قدامك .. مين جارك
واتلَفِت م الحِين للحِين
فكَّر واتدبَّر في الكون
وإعرف من غيرك وإتعلم
ربك هيكون لك في العون
والصعب ف إيدك حَيسَلِم
بقلمي الشاعر جمال زكي عينر
ليست هناك تعليقات:
إرسال تعليق