عم رمضان كريم
*******************
فى المغربيه شاف صبيه
فى المشربيه
تنادى تقول ياعرقسوس
تعالى عندى
بصت لقت راجل كبير
وافقين حواليه أطفال كتير
عم رمضان واقف معاهم
يهدى لهم شمع الفانوس
من غير فلوس
ينادى بأعلى صوت تعالوا
أعزمكم على عرقسوس
خبط على بابه
عم رمضان طيب
بيسعد أصحابه
بكى الولد من فرحته
وأفتكر أحبابه
عم رمضان
قاله ياريحة الحبايب
جدك كان صاحبى
طول عمرى أشرب
العرقسوس عنده
كان يسقى الناس ويفرحهم
وقلبه من الهموم شارب
يغنى وينادى ويضحك
ياعرق سوس شفا وخمير
للصغير وللكبير
فرحان لشهر الخير
وهو ياعينى
من وجع الهموم هارب
يعاتب زمانه
وعارف إن ربه
للنصيب كاتب
يلف الدنيا رايح جاى
على رزقه
ولضيق الرزق عمره
ماعاتب
يسقى الغلبان
ويا الغنى
طبع الأصيل
إبن الإصول غالب
تعب جدك وحيله إنهد
ولطوله من الشقى
مابقى صالب
يادبحة القلب الحزين
لما لمة القلوب تتفرق
وأعز مافيهم غايب
ودقة القلب نار تحرق
بعد إللى راحوا
مابقا لينا
من الفرح نايب
نبكى عليهم
والدمع من حرقة الوجع
جوه العيون يغلى
كنا بنضحك مع بعضنا
والدنيا لضحكتنا بتدوى
والدمعه كانت
تنزل من الضحكه
قلوب طيبه
عليه العوض
وألف خساره
على اللى راحوا
من بعدهم
شوك الحنين
طرح فى الحلوق حنضل
عم رمضان كريم
حبه للناس
من سنه لسنه يكبر
وعمره للفقير
أبدا ما قصر.
ذكريات العمر
عبير محمد
مصر
ليست هناك تعليقات:
إرسال تعليق