( روحك شبهي )
أيقنت خلاص إنك شبهي...
وإن الأسلوب نفس الأسلوب...
ولقيت إنك شغفي وولهي...
وإن غرامك بقي شئ مكتوب...
دورت ما بين طيات عشقي...
علي عيب جواك مالقيتش عيوب...
ولقيتني بقيت شيخ روحاني...
يقرا الطالع ويا المشطوب...
وبقيت درويش في هواك بيعيش...
والخلق بتجري وراه بالطوب...
إنسان آلي أنا في غرامك...
تطلب يعمل كل المطلوب...
طرزان في غابات مافيهاش أشجار...
يطنطط بين تفاصيل قلبك...
يجمع أزهار...
ويلاقي عنيك فراشات بتطير...
ونجوم في السما تلمع بالليل...
ويكسر من مقاديف حضنه...
أشواق يعملها مشاعل نار...
علشان حرارتها تعيش حواليك...
ويكون جنبك نبضه يدفيك...
ويحاجي عليك...
يرسل إشارات ويغازل فيك...
ذبذبه مليانه حنين بالكوم ...
تفضل جواك ومعاك علي طول...
وقت الصحيان وفي عز النوم...
تفضل ترقص جوه منامك...
تحكيلي كمان عن أحلامك...
ترسملك سما ونجوم وقلوب...
تفضل تحكيلي في تفاصيلك...
وأنا روحي تجيلك تحكيلك...
واسرح وارقص جوه خيالك...
وكمان أشواقي تغنيلك...
مانت المعشوق وإنت المحبوب.
عصام السعدني..
ليست هناك تعليقات:
إرسال تعليق