محكية (بالعامية السورية)
غربة وجع :
بجوانحك يلي فوق القلب حطيت...
وبدياتك يلي دموع الأسى
لميت...
وبمطارحك شوية حكي
عن غيابك...يلي منو ....غصة عمر
لفيت...
كيف اشتقتلك كل الزوايا والصور
عالحيط...
والشجر يلي عم يشوحلك
والحرش يلي مقابل التلة
ويلي بحضن خضرتو
تخبيت..
لبيادر القمح والغلة ..
يلي ما عاد إلها
أثر ضنيت...
راح السبل من العطش
عالحقلة
وراح الشجر وما ظل عنا
زيت...
ماظل غير الريح بيغني
بيصفر صفير ...وبيشتكي من
الوجع من كثر ماعنيت..
والروح تندهلك....لترجع من
من السفر راحوا الأهل وتغربوا
الحبايب وماظل حدا
بالبيت
ومن حملت ريشاتك صوب السفر
وحيات غربتك والهجر
ماغنيت
خسارة مبطنة بخصلة عتب
بتروح لتقلك ...وين الوفا يلي
شربت من قلبي جرعة
عمر..... عبيت
والوردة يلى حاملي عطر
دمعاتك وريحة عطش مياتك
منها الفرح ضميت..
لشلح ورد على فراشك يلي
ناطرك بين السما والأرض
صار يضحكلك
و دفاترك وحبرات
حروف قلامك
لتقلك...إني
من البعد مليت
ومثل السياج يلي حارس ترباتك
ومواسمك من كثر البرد
صديت
بقلمي :مفيدأبوفياض
ليست هناك تعليقات:
إرسال تعليق