( جرحك وجيع ) شعر محكي
فرشتي حصيرة شوكك ونمتي
وروحك هشيم وفكرك مكركب
وجرحك وجيع وشو تألّمتي
تا النور بعيونك طفي وغرّب
يابلاد أحلى من الحلا كنتي
قامة صبا مخضلّ ومشبشب
مرقتْ عليكي حروب وصمدتي
وعزمك حديد وفكرك ملهلب
وبفرد مرّة اليوم ختيرتي
وضهرك حني عالشقى وتحردب
صرتي ياحسرة بتشبهي ستي
بآخر سنين العمر المسرسب
عن جدّ أنتي اللي تغيّرتي
ولّا أنا محموم ومكرّب ..؟!
اختلطت الصورة بصحن ذاكرتي
والحزن جوّا الذاكرة عنكب
تا صرت شوف بوجه فاتنتي
مسحة شحوب الموت المقطّب
ياما شعوب بحلمك صقلتي
وكنتي حضن دافي وقلب أطيب
طحنتي حبوب الخير وعجنتي
حتّى الجائع ياكل ويشرب
ياهل ترى عالكبر خرّفتي
ولّا ولادك عقلن تخرّب ..؟!
تا كلّ واحد قال طايفتي
وغيّب شعاع الوعي وتعصّب
ياشوكة ال بالجسد عمّلتي
ريت الجسد عاالورم يتغلّب
ويا ريت هالأديان سورنتي
يمكن بعين الخالقك أصوب
كانت سوريّة الأمّ حاضنتي
بوجدان معتنقينها مذهب
وهالة سلام بأرضك نشرتي
من خيوط فجر الحبّ المقصّب
وبقلوب أجيال الوفا سكنتي
وحصنك منيع وشانك مرجّب
وأنزف حبر وتفيض خاطرتي
تا أرسمك لوحة صلا وأكتب
وتقشع مواكب عزّ باصرتي
ترمح بساحة مجدك الأرحب
وبنت الجبال مشنكلي بنتي
وأخوة وطن بسهول عم تلعب
وترتّل الأجراس ملحمتي
وصوت الأذان يترغل ويطرب
وكلّ سوري قبلتو أنتي
ياسورية يا عشقنا الأسمى
كنتي إلهة وتاجك مذهّب
شعر: بسام الأسبر 18/7/2022
ليست هناك تعليقات:
إرسال تعليق