الحلقة الحادية عشر:
نزل علاء يوصل الدكتور وطلع لسهام وباسها من خدها
"ألف مبروووووك ياحبيبتي ...من النهاردة متقوميش خالص من السرير...أنا عاوز بنوتة قمر كده زي مامتها "
"لاء ياحبيبي....أنا اللي عاوزة ولد يكون شبهك في كل حاجة وخصوصاً حنيتك"
دخل مهندس فتحي"ألف مبروك يابنتي ..ربنا يقومك بالسلامه...مبروك ياعلاء ياحبيبي..."
علاء وسهام في صوت واحد"ربنا يبارك فيك يابابا"
أول ما ٱبراهيم دخل حضن أخوه جااااامد"الف مبروووك ياعلاء... والله فرحت لك انت وسهام "
"ألف مبروووك يا سهام ..ربنا يقومك بالسلامة "
سهام"ربنا يبارك فيك ياإبراهيم عقبال ما نفرح بيك"
علاء"يلا يا بطل ...إنت الوقتي بقيت مهندس أد الدنيا ..معتش لك حجة شاور لنا أنت بس علي عروسة واحنا نخطبها لك ... .. الله يكون في عونها ... "
إبراهيم"لا....لسة بدري علي الموضوع ده...وبعدين أنا لسة مقبلتش العروسة اللي تستهلني " ضحكوا كلهم علي كلمته ....واستأذن وخرج عشان هيسافر يتفسح مع صحابه كام يوم بمناسبة تخرجهم .....
3شهور عدوا علي حمل سهام وهي نايمة في السرير عشان حملها صعب وميستحملش مجهود كبير ولا زعل ...
مامتها وعصام كانوا بيزورها من يوم للتاني ويطمنوا علي تاليا...
سهام معدتش بتفكر في هشام خالص ...بقا كل تركيزها في جوزها وحملها وتاليا.....
مهندس فتحي طبعا غني جدا ...له شركات في بلاد كتيرة...بيمر هو وعلاء علي المهندسين من وقت للتاني عشان يطمنوا علي الشغل ....
وفي يوم مدير شركة من الشركات إتصل به وإستأذنه إنه يعدي عليه ضروري يمضي علي إستلام طلبية الجديدة....
مهندس فتحي "حاضر...هعدي عليك بكرة إن شاء الله أنا وعلاء"
المدير"وانا في إنتظاركم....تيجوا بالسلامة"..
مهندس فتحي ضبط مع علاء يروحوا بكرة أن شاء الله..وبعد العشاء إستاذن علاء "أنا طالع بقا يابابا عشان أصحي بدري بكرة أن شاء الله"
"إتفضل ياابني ...تصبح على خير"..
تاليا دخلت تنام في أوضتها...وعلاء وسهام دخلوا أوضتهم...
بعد ساعة قام علاء يروح الحمام ويطمن علي تاليا .لاقها كاشفة البطانية..بيغطيها وبيبوسها...لاقها ناااار....درجة حرارتها عالية جداً...إتخض عليها وإتصل بالدكتور
بعد ما الدكتور فحصها وبيكتب الروشتة
علاء وهو حزين وماسك إيد بنته وسهام قاعدة جانبها دموعها نازلة
"مالها يادكتور....عندها أيه !!!؟؟؟"
"للأسف عندها حمي شديدة ...بس متقلقوش هتتحسن علي العلاج إن شاء الله"
سهام وعلاء ومهندس فتحي فضلوا طول الليل سهرانين جنب تاليا ...اول ما النهار طلع كانت درجة حرارتها نزلت كتير عن بالليل.......مهندس فتحي قرب من علاء "أنا هتصل بمدير المصنع ألغي معاه ميعاد النهاردة أو هأخذ السواق وأروح أنا... وخليك إنت جنب بنتك ...إنت طول الليل وانت سهران"
"لا...يابابا مقدرش أسيبك تسافر لوحدك ... .تاليا الحمد لله إتحسنت عن إمبارح كتير..هشرب بس فنجان قهوه وهاجي معاك ... عشان نرجع علي طول..."
وبص لسهام"ولو حصل حاجة ياحبيبتي لقدر الله ..إبقي كلمينا ..وإحنا أن شاء الله مش هنتأخر"
"متقلقش ياحبيبي ...أنا هفضل جانبها علي ما ترجعوا ...تروحوا وتيجوا بألف سلامة"...
قام علاء خد شاور علي ما الشغالة عملت له القهوة...وقبل ما يخرج حضن تاليا وسهام وباسهم كتييييير
وقرب من سهام أوووي"خدوا بالكم من نفسكم ياحبيبتي علي ما أرجع..وحاولي تنامي لك شوية إنت سهرانة طول الليل ..."
ووطي علي بطنها باسها"وخدي بالك من النونو ياحبيبتي"
باسته سهام من خده "حاضر ياحبيبي...خد بالك إنت بس من طريقك وإنت سايق...وتعال بسرعة عشان هتوحشني كتيييييير"
"حاضر ياساكنة قلبي ...كم ساعة إن شاء الله وهرجعلك"
كل ده وهي ماسكة إيده...مش عاوزة تسيبها
"ترجع بالسلامة ياحبيبي..."
يدوب لسة نازل علي السلم نادت عليه" علاااااااااااء"
بص لها "لا إله إلا الله ياحبيبي"
"سيدنا محمد رسول الله ياحبيبتي"
ودخلت تبص عليهم من الشباك لحد ما العربية بعدت عن نظرها...
الطريق في اليوم ده كان زحمة جداً...وعلاء بيفتح عنيه بالعافية ... وأخيراً وصلوا بعد مشوار طويل...
بعد ما خلصوا شغلهم ...مهندس فتحي قلقان علي حالة إبنه ...مال عليه هامس"ايه رايك ياابني نبيت النهاردة في شقتنا اللي هنا ونسافر بكرة الصبح إن شاء الله عشان ترتاح لك شوية"..
"متقلقش يابابا ...أنا كويس...مينفعش أبات... إنت شايف تاليا تعبانة إزاي ...ولازم ارجع عشان أطمن عليها ...وكمان سهام كانت سهرانة معانا طول الليل... فخايف لتتعب من الارهاق وانت عارف حملها صعب ..وهي لوحدها ...."
"اللي تشوفه ياإبني ....ربنا يرجعك لهم بالسلامة"
مهندس فتحي وعلاء بيركبوا العربية راجعين...
علاء بيتمتم في سره"يااارب الزحمة تكون قلت ...عشان أوصل بسرعة أطمن علي تاليا وسهام "
لما طلعوا علي الطريق ...الزحمة فعلاً كانت قلت ...وعلاء سايق بسرعة كبيييرة... فجاءة ...تريلا ...ظهرت قدامه
مهندس فتحي "حااااااااسب"
ملحقش يمسك فرامل وخبط في.. التريلا ...والعربية إتقلبت بهم...
الإسعاف جات بسرعة ...ونقلتهم المستشفي
تليفون الڤيلا رن.. ردت سهام من أوضة تاليا...
"ألوووو....منزل مهندس فتحي"
وأول ما سمعت كده ...جه في بالها علي طول... أختها إبتسام لما عملت حادثة ....وهي برضو اللي ردت علي التليفون...
سهام وهي خائفة جدا ليكون اللي في بالها
"أيوه بيته ....مين معايا"
"إحنا مستشفي النيل ....وللأسف مهندس فتحي وعلاء عملوا حادثة "
"بتقول أيه...حااااااادثة....لاءءءءء..."
والسماعة وقعت من إيدها وهي وقعت علي الارض وأغمي عليها.....
###############
**تغيير مسار**
**مها بركات**
ليست هناك تعليقات:
إرسال تعليق