الحلقة التاسعة:
الأخبار إتنقلت في الشارع بسرعة إن سهام هتتجوز علاء زوج أختها ...إبراهيم لما عرف مكنش مصدق إن سهام وافقت بالسرعة دي لانه عارف حبها لهشام .. بس طبعاً مقلش لباباه أي حاجة...هشام بقا لما عرف الخبر كان زي المجنون وعمال يكلم نفسه
"إزاي سهام تعمل كده ...ووعدها ليا....معقول سهام كانت بتخدعني كل الوقت ده...ليه بس كده ياسهام!!!!"
ومحدش للأسف كان فاهم أن الظروف ٱضطرتها لكده....وأنها تخلت عن حلم عمرها وجاية علي نفسها عشان خاطر مامتها وخاطر تاليا....
أول يوم دخول الجامعة لهشام وإبراهيم كان يوم فرح سهام علي علاء....
مهندس فتحي كان لافف وداير وميفتوش واجب وعشان
عارف إن سهام لسة بنت مفرحتش قبل كده قرر إنها لازم تحس انها عروسة مش سد خانة.... فحجز لها فستان فرح وكمان قاعة غالية أوووي....
مهندس فتحي راح لهم البيت نادي علي سهام " تعالي يابنتي عاوز أتكلم معاكي"
"حاضر ياعمو ...خير"
"أنا حجزت لك فستان فرح يارب يعجبك وحجزت كمان قاعة عشان إنت لازم تفرحي زي أي عروسة كفاية الظروف الوحشة اللي انت مريتي بيها"
سهام بكل إستغراب"فستان وفرح أيه ياعمو...إحنا هنكتب الكتاب هنا ...وهروح البيت مع علاء وخلاص"
"يابنتي كفاياكي حزن ...ودا يومك ولازم تفرحي فيه..ولا أيه ياأم ابتسام"
الأم "اللي تشوفه يابشمهندس ".
يوم الفرح راحت سهام الكوافير لوحدها غير اي عروسة..ورغم حزنها بعد المكياچ كانت أجمل عروسة ...أول ما علاء شافها مكنش مصدق حلاوتها
وكل المعازيم كانوا مبهورين بجمالها...ورغم فرحة كل اللي في القاعة ...سهام كانت بترسم الإبتسامة علي وشها عشان الصور والمعازيم لكنها جواها حزن العالم كله علي كل حاجة راحت منها.....وسرحت مع نفسها شوية وسألت نفسها"ياتري أنا كده اتصرفت صح لما اتخليت عن حلمي !!
وكسرت وعدي لهشام !!!ياتري بيقول عليا أيه الوقتي !!"
والفرح عدي بسرعة . .وروحت سهام الڤيلا ....
علاء كان ذوق أوووي مع سهام ...عمره ما غصب عليها تنام جانبه وتسيب تاليا..كان بيسبها براحتها...لدرجة أن أول شهر جواز نامته كله جانب تاليا في أوضتها ....وعلاء كان يبنام لوحده ...عشان مقدر إنهم لسة ميعرفوش بعض والفرح تم بسرعة ....
بعد الفرح بالليل هشام كان هيتجنن وعمال يكلم نفسه
مش مصدق إن حب عمره راح لحد تاني وإن سهام خلاص
مبقتش من حقه....
في ليلة فرحها منمش طول الليل قاعد علي سريره بيفكر فيها وإنها كانت حلم جميل.... وراح... وإنها خانته لما كسرت وعدها له واتجوزت غيره ...وأقنع نفسه أن كل الستات خاينين زيها ....وأنه عمره ما هيسلم قلبه لحد تاني ..ومفيش قدامه غير إنه يفكر في مستقبله وخلاص
يمكن ينسي...
سهام مكنتش عايشة بطبيعتها مع كل اللي في الڤيلا إلا مع تاليا كانت بتحاول تعوضها عن حنان الأم ..
بس برضو مش قادرة متفكرش في نفسها وانها في غمضة عين لقت نفسها كبرت مرة واحدة فجاءة بقت أم لتاليا وكمان زوجة لزوج أختها اللي كانت بتعتبره زي أخوها...وفوق كل ده ... إن جوزها له حقوق عليها....
وهي قلبها لسة مشغول بهشام...
وعاشت سهام عيشة غنية جدا مع علاء وتاليا..رغم أن مامتها وعصام يدوب إيراد المحل بيكفي مصاريف البيت ومصاريف مدرسة عصام بالعافية...
لما سهام شافت حالهم ده عرضت علي مامتها فلوس أو إنها تتكفل بمصاريف أخوها ...لكن مامتها رفضت بشدة...
سهام بالها مشغول بظروف مامتها المادية الصعبة بعد موت باباها وبتمتم في سرها"لو انا الوقتي كنت رفضت الجواز من علاء ...كنت هصرف منين في الجامعة"وقعدت تواسي نفسها انها اختارت القرار الصح...
بس كان جواها حزن كبير علي حلم عمرها اللي ضاع وخيالها راح لبعيد وفكرت تاني في هشام ودموعها نازلة علي خدودها
"ياتري هشام عامل ايه الوقتي!!!
وياتري بقا شكله ازاي بعد مرور 5 سنين "
وفجاءة دخلت عليها تاليا وقطعت حبل أفكارها
"ماماااااا....بابا جه ياماماااا"
دخلت الحمام بسرعة غسلت وشها ونزلت عشان يتغدوا...
بعد الغدا علاء طلع أوضته يريح شوية وسهام طلعت معاه
وتاليا بتلعب مع جدها في جنينة الڤيلا...
العلاقة بين سهام وعلاء كانت باردة جدا مكنش فيها أي شوق ولا اشتياق ولا حب يدوب تأدية واجب... وأهو جواز وأيام وبتعدي...
علاء برضو مكنش مهتم بأي علاقة عاطفية أو جنسية بينهم كان كل كام شهر علي ما يعملوا علاقة مع بعض ..مكنش بيفكر الا في شغله ليل نهار ...
عدي 5سنين علي جوازهم وسهام لسة مخلفتش...مكنش حد فيهم شاغل باله بموضوع الخلفة ده خالص
إنما مهندس فتحي خد باله من الموضوع ده وفي مرة قال لعلاء"إنتوا مش ناويين تجيبوا أخ أو أخت لتاليا ولا ايه"
علاء وهو مكسوف"إن شاء الله يابابا"
وفي نفس الوقت بيتمتم في سره"نخلف إزاي !!!! وإحنا فضلنا بعد الجواز أكثر من سنة عايشين مع بعض إخوات ..
ولما قربنا من بعض شوية...بقينا كل فين ..وفين علي ما بنعمل علاقة مع بعض !!!"
باباه شافه واقف مسهم فخبطه علي كتفه"أنا عارف اني شاغلك معايا في الشركة ورامي الحمل كله عليك أهي هانت واخوك قرب يخلص الكلية ويشيل معاك ...بس علي ما ده يحصل أنا هخفف الضغط من عليك شوية عشان تتفرغ لبنتك ومراتك....وأهي فرصة تقرب من مراتك شوية لأنك من ساعة ما إبتسام ماتت وإنت دافن نفسك في الشغل ليل ونهار... وسهام مراتك برضو ولها حق عليك"
"حاضر يابابا "
"حاضر أيه....هو ده فيه حاضر... اطلع يلا لمراتك ... وأنا هأخذ تاليا تنام في حضني النهاردة"
علاء طلع أوضته لقي سهام لابسة روب أسود كانت فيه زي القمر...
أول ما شافها لقي نفسه بيقول بتلقائية"أيه القمر ده"
وقرب منها أوووي"دا الروب هيأكل منك حتة...معقول أنا متزوجك بقا لي 5 سنين ومش واخد بالي اني متجوز قمر14"
سهام إتكسفت وبصت في الأرض وخدودها إحمرت
قرب منها علاء أكتر ...ولمس خدودها بإيده
"معقول التفاح الأحمر اللي في خدودك ده "
إتكسفت سهام أوووي... وجت تبعد نفسها.. مسكها من إيدها
بحنية "أنا عارف إن جوازنا جه فجأءة ...وممكن تكوني مكونتيش عاوزة تتجوزيني "
قاطعته بسرعة "انت طيب ومحترم أوووي علي فكرة... وأي واحدة تتمناك"
"إنت ياسهام اللي جميلة أووووي...وحنينة أووووي...
ربنا يقدرني وأعرف اسعدك".
"ومين قال لك إني فعلاً مش سعيدة....أنا سعيدة بوجودك جانبي أنت وتاليا"
مكنش مصدق ودانه وقربها له أوووي وهمس لها"أيه الكلام الحلو ده ..ربنا يخليك ليا"وباسها من جبينها
"علي فكرة ياسهام انت سهلتي عليا حاجة بابا لسة طالبها مني حالا...عشان كده خد تاليا تنام جانبه النهاردة " سهام تقريبا فهمت قصده ..بس كانت عاوزة تتأكد
"خير....طمني...بابا عاوز أيه!!!!".
"بابا ياستي عاوزنا نخلف.... وبيقول إن تاليا كبرت ومعتش فيه حجة... لتأخير الخلفة كل ده".
سهام قامت وقفت فجاءة"نخلف.... طب ازاي !!!!!"
################
**تغيير مسار**
**مها بركات**
ليست هناك تعليقات:
إرسال تعليق