الحلقة الثالثة:
سهام خبطت علي الباب أول ما إبتسام فتحت لها"باركي لي ياإبتسام،أخيراً خلصت إمتحانات" "طب يلا تعالي ساعديني في تجهيز الغدا عشان ماما واقفة في المحل مع بابا من الصبح وسيباني لوحدي"
"حاضر ياستي ،هغير بس هدومي".
بعد ساعة باباها وماماتها وأخوهم عصام أول ما دخلوا الشقة "أيه ريحة الأكل الحلوة دي ،هي الريحة دي عندنا"
إبتسام وهي مبسوطة "آه والله من عندنا ،هجهز لكم الغدا حالاً ، يلا ياسهام تعالي جهزي معايا."
دخل البنات المطبخ يجهزوا الغدا ،وإبتسام كانت سعيدة جدا إن ريحة الأكل عجبتهم، عشان مكنتش بتدخل المطبخ كتير إلا لما تكون ماماتها مشغولة مع باباها في المحل عشان هي في آخر سنة" كلية تجارة إنجلش".
الغدا كان طعمه حلوووو أوووي زي ريحته،
الأب وهو مبسوط "إنتوا كده بقا يابنات عليكم تجهيز الغدا كل يوم ، أنا أول مرة أكل أكلة بالطعامة دي".
البنات كانوا مبسوطين جدا برأي باباهم.
الأم"بقاااا كده ،ما أنا اللي علمتهم الطبخ "
"ياستي وأنا قلت حاجة ، تسلم اللي علمتهم وتسلم الأيادي اللي طبخت، وبعدين هو إنتِ تزعلي إن بناتك يكون نفسهم في الأكل حلو"
"لا طبعاً ،دي حاجة تفرحني."
إبتسمت إبتسام لماماتها وقالت"خلاص بقا يا ماما ،ربنا يخليكي لنا إنتِ وبابا ، بس يكون في علمكم أنا اللي جهزت الغدا ده كله لوحدي يدوب سهام عملت السلطة "
سهام وهي زعلانة"بقا كده ياإبتسام،يعني أنا مساعدتكيش
وأنا اللي كنت راجعة من الإمتحان تعبانة ومرضتش أقول لك لاء وساعدتك"
الأب وهو بيبتسم لسهام"متزعلش نفسك ياحبيبتي ،دي ألذ حاجة علي الأكل هي السلطة ،وبعدين يكون في علمكم الأهم من الأكل هو تحبيش الأكل والسلطات ولا أيه"
إبتسمت سهام"ربنا يخليك ليا يا بابا....دايماً جابر بخاطري
مش زي ناس".
الأب والأم"ربنا يبارك لنا فيكم يابنات، دا أنتوا وعصام أجمل حاجة في حياتنا"
وإبتسموا كلهم لبعض،، وكل واحد دخل أوضته يريح بعد الغدا ...
الأب والأم أول ما فردوا جسمهم علي السرير ناموا عشان كانوا تعبانين من الوقفة في المحل.
عصام قعد يتفرج علي التليفزيون عشان لسة في إبتدائي
سهام وإبتسام دخلوا أوضتهم كل واحدة علي سريرها ،
سهام بتفكر في كلام هشام وفرحانة أوي بحبه لها،بعد ربع ساعة راحت في النوم عشان كانت سهرانة إمبارح طول الليل بتذاكر...
إبتسام عمالة تفكر في مستقبلها وأنها في آخر سنة ،
وياتري بعد ما تخلص إمتحانات باباها هيوافق إنها تشتغل ولا هتقعد في البيت وخصوصاً إنها مش مخطوبة..
هي حلوة بس مش في نفس حلاوة إبتسام....
المغرب أذن ،كلهم صحيوا عشان يتوضوا ويصلوا جماعة زي ما باباهم معودهم..
بعد المغرب قعدوا يتفرجوا علي التليفزيون ،وإبتسام دخلت تذاكر عشان كان عندها إمتحان بعد أسبوع...
الأب"يعني مقولتيش عملتِ أيه النهاردة في الامتحان ياسهام ،معلش الكلام عن طعامة الغدا النهاردة نساني أسئلك"
"الحمد لله يابابا،حليت كويس"
الأم "ربنا يوفقك يابنتي ".
إبتسام بتمتحن ونتيجة سهام قربت تظهر وكانت قلقانة جدآ وكل إما تفتكر كلام هشام لها"ركزي كويس عشان تطلعي الأولي "تفضل تضحك ..
هشام بقا كان قلقان علي نتيجته ونتيجة سهام...
تاني يوم النتيجة ظهرت ،سهام وهشام وإبراهيم إتقابلوا صدفة عند المدرسة وقت النتيجة....
سهام وهشام كانوا واقفين قدام النتيجة مش مصدقين نفسهم إنهم جابوا نفس المجموع وطلعوا الأوائل..وعشان الزحمة إكتفوا بس بنظرة وإبتسامة لبعض وكل واحد راح بيته ...وكل أسرة إحتفلت بالنجاح بطريقتها...
إبراهيم زميلهم كان ناقص عنهم درجة وطلع التاني بس كان فرحان برضو عشان مجموعه هيدخله ثانوي ... وخلاص هانت كلها 3 سنين ويبقا مهندس....
سهام بقا فرحتها مدامتش كتير ...قبل ما تطلع الشقة عدت علي باباها في المحل وبأعلي صوتها" يابابااااا....يابابااااا أنا نجحت وطلعت الأولي".
باباها حضنها وقال لها "ألف مبروك ياحبيبتي ،ربنا يوفقك وأشوفك دكتورة قد الدنيا"
"يااارب يابابا،أنا هطلع بقا أفرح ماما"..
إبتسام فتحت لها الباب "هاااا...عملتِ أيه نقول مبروك ولا"
"عيب عليكي ..أنا طلعت الأولي ...فين ماما!!؟؟ياماماااااا".
خرجت الأم من المطبخ تزغرد وتحضن وتبوس سهام"ألف مبروك ياحبيبتي ،عقبال ما أفرح بنجاحك إنتِ كمان ياإبتسام ".
فجاءة الأب فتح الباب بس كان شكله تعبان أووووي...
أول ما سهام شافته إتخضت عليه وراحت جانبه
"مالك يابابا....إنت كويس".
"متقلقيش ياحبيبتي ،أنا مرهق بس شوية من الوقفة في المحل ،هدخل أريح شوية ولما تجهزوا الغدا إبقوا صحوني"
"حاضر ياأحلي بابا"..
بعد ساعة دخلت الأم الأوضة عشان تصحيه والبنات بيجهزوا السفرة ،
وفجاءة سمعوا ماماتهم بتصوووت" يالهووووي...إلحقوني"
"إلحقوني يابناااات...أبوكوا واقع علي الأرض ومبيتحركش
إلحقووووووني." !!!!!!!!
**################**
**تغيير مسار**
** مها بركات**
ليست هناك تعليقات:
إرسال تعليق