الحلقة الثانية:
فاضل خلاص شهرين علي الامتحانات ،سهام قررت قرار وإفتكرت وعدها لهشام وأول ما شافته قالت له بكل رقة
"أنا هغيب من المدرسة الفترة دي ،هروح الدروس وخلاص
وهذاكر في البيت " رد هشام عليها وهو مبسوط أنها عرفته زي ما وعدته "بس طبعاً هشوفكِ في الدروس".
"أكيد، بس عندي طلب صغير منك يا هشام" رد عليها هشام وهو مسترجل شوية "إتفضلي ،إنتِ تؤمريني".
وبإبتسامة قالت له "إحنا عاوزين الفترة دي نسيبنا من أي كلام بينا ومنفكرش غير في مذاكرتنا عشان إن شاء الله نجيب مجموع كويس يدخلنا ثانوي عام" هشام بكل حماس" وأنا موافق، وعلي فكرة أنا كنت هطلب منك الطلب ده ،عشان بس تتأكدي أننا تفكيرنا زي بعض."
"خلاص بقا ياهشام متكسفنيش"."هو أنا قلت حاجة عشان تتكسفي"."والله همشي وأسيبك."ولسة جاية تمشي شدها من إيدها وبكل رقة"خلاص ياستي ...حقك عليا ،هسكت خالص""أيوة كده وريني إبتسامتك الحلوة دي،ووعد مني مش هتكلم معاكِ غير في مذاكرتنا الفترة دي".
طول الليل وسهام وهشام سهرانين بيذاكروا عشان بكرة أول يوم إمتحان..سهام كانت متوترة جداً وخايفة،هشام كان متماسك عنها شوية وقرب عليها وقال"ركزي كويس ياسهام،وإقرأي الأسئلة كويس ..أنا عاوزاك تطلعي علينا الأولي السنة دي،وأنا ياستي مش هحل كويس عشان تتفوقي عليا."وبكل دهشة ردت عليه"كده ياهشام هتزعلني منك،لو كنت بتحب....."ومكملتش الكلمة"ركز كويس عشان تجيب مجموع حلو."
"سيبك إنتِ من المجموع الوقتي،وقولي لي ...إنتِ قلتِ..."لو كنت أيه"....!!!!
"خلاص الوقتي ياهشام ،إحنا داخلين اللجنة،ولازم نركز ،ولا إنت نسيت وعدك ليا"."ياستي خلاص ..حقك عليا ،هستحمل أسبوع الامتحانات ده ومش هتكلم في حاجة خالص" سهام وهي بتبص له "يبقا أحسن برضو"."كده يعني ...ماشي ياسهام ..بس متنسيش آخر يوم نروح سوا"
"حاضر ..مش هنسي،يلا ..عشان ندخل اللجنة بقا".
"ركزي كويس"هزت سهام رأسها بالموافقة ،وابتسموا لبعض ودخلوا الامتحان..
الإمتحان كان طويل ،بس كان سهل ،وهما وإبراهيم حلوا كويس...والنهاردة خلاص آخر يوم في الامتحان
وقبل ما سهام تدخل لجنتها نادي عليها هشام بعلو صوته
"سهااااام...متنسيش اللي يخرج الأول يستني التاني"
واكتفت بإبتسامة ودخلت اللجنة..
إمتحان الشهادة الأعدادية خلص،وكل الطلبة كانوا فرحانين إن السنة الطويلة دي عدت ، هشام وسهام وإبراهيم بصوا لبعض وقالوا في صوت واحد"عقبال النتيجة ونفرح كلنا وندخل ثانوي عام."
وهما واقفين قدام المدرسة،والد إبراهيم عدي عليه خذه بالعربية لأنه كان أغني واحد فيهم..وإستأذنهم ومشي.
هشام وسهام ظروفهم المادية متوسطة محدش من أهلهم عنده عربية...
هشام باباه وماماته مدرسين ،يدوب المرتب بيكفي مصاريف البيت ومصاريف دراسته هو وأخوه "إسلام"
الأصغر منه بسنتين..
سهام باباها فاتح محل أدوات منزلية تحت البيت ،وماماتها ست بيت،يدوب إيراد المحل بيكفي مصاريف البيت ومصاريفهم هي وأختها الكبيرة" إبتسام "وأخوهم "عصام" الصغير..
طول الطريق وهما ماشين مع بعض لأن بيوتهم قريبة من بعض في نفس المنطقة ..سهام وهي ماشية رجلها إتكعبلت وكانت هتقع لولا هشام لحقها ومسكها من إيدها "مش تأخذي بالك ياسهام"."الحمد لله سليمة"
"بس برضو خدي بالك ،إفرضي الوقتي كنتِ ماشية لوحدك ،كان مين هيلحقك".
إتكسفت سهام والدم كان هينط من خدودها "خلاص بقا يا هشام ،غير الموضوع"."ماشي ياستي هغيره،بس إوعديني تأخذي بالك من نفسك عشان أبقا مطمن عليكي ،وربنا يهون شهور الأجازة دول عشان مبعرفش أشوفك ولا أكلمك.""حاضر...متقلقش عليا."
قرب هشام منها وبكل رقة قال لها"أنا عاوز أقول لك حاجة بس متتكسفيش وردي عليا بصراحة.""اتفضل"
"فاكرة أول السنة لما قلت لك إننا إن شاء الله لما ندخل الجامعة هفاتح بابا وماما في موضوع حبنا وأجي أخطبك ،ممكن أعرف رأيك،بس بصراحة ومن غير كسوف!!؟؟؟"
بصت له وهي مكسوفة جداً"ياهشام إحنا لسة صغيرين علي الكلام ده ،إحنا فين والجامعة فين،متسبقش الأيام
يمكن ياسيدي لما تروح الجامعة تقابل واحدة أحسن مني"
رد عليها هشام بعصبية"ايه اللي إنتِ بتقوليه ده !!!! أنا عمري ما هشوف غيرك ولا عاوز غيرك في حياتي،إحنا حبنا كبر معانا ياسهام ولا أيه !!!
وخدودها بدأت تحمر تاني ،إبتسم لها هشام "مش قولنا مفيش كسوف ""أعمل أيه غصب عني ،ما أنت اللي مصمم تكسفني بكلامك ده."
"ما إنتِ اللي مش راضية تردي عليا ،ياستي ردي عليا وريحني بقا ومش هفاتحك في الموضوع ده تاني عشان ياستي لا تتكسفي ولا تتكعبلي"
بصت له سهام وهي عمالة تتأتأ في الكلام ومش عارفة تبدأ منين "أنا عمري ما هحب غيرك يا هشام "
"إنتِ قلتِ أيه!! قوليها تاني عشان خاطري "
"خلاص بقا ياهشام ،متكسفنيش أكتر من كده"
"ياستي خلاص ،الحمد لله إنك نطقتي وقلتِ حاجة أصلا،
كان فين الكلام الحلو ده من زمان ،دي أحسن كلمة سمعتها في حياتي، أنا بحبك أوووي ياسهام ،وعمري ما أقدر أتخيل حياتي من غيرك "
وسبته ودخلت بيتها وهي هتموت من الكسوف وفي نفس الوقت فرحانة جدا بكلامه وهو كمان كان طاير من الفرحة !!!!!
** ################**
**تغيير مسار**
**مها بركات**
ليست هناك تعليقات:
إرسال تعليق