الحلقة الثالثة عشر:
بعد مرور 5 شهور ...قدرت سهام تتمالك نفسها وتستوعب
موت زوجها وفقدان جنينها...
وكانت لازم تقف علي رجلها تاني وتكمل عشان خاطر تاليا
اللي بقت يتمية الأم والأب....
كل مسؤليات الشغل كانت علي إبراهيم بعد ما باباه وأخوه توفوا ....كان كل يوم الصبح يعدي علي الشركات يطمن علي الشغل بنفسه ... ويرجع آخر النهار يتعشي وينام...
سهام طول النهار قاعدة مع تاليا ....كانت مامتها بتعدي عليها من وقت للتاني تتطمن عليها وعلي تاليا ...وعصام يفضل يلعب مع تاليا ....وبعدين يروحوا...
طول الفترة دي وأخبار سهام إنقطعت عن هشام من ساعة ما إجوزت من 7 سنين....
هشام كان كل تركيزه في دراسته وإنه يحاول يحافظ علي تقديره كل سنة ....عشان يتعين معيد في الجامعة ..
كان فعلاً مجتهد وذكي ...ودكاترته رشحته يتعين معيد...
وأول مرة هشام يفرح من قلبه بجد من 7سنين من ساعة سهام ما سابته واتجوزت ....
أول ما هشام دخل البيت ...دخل لمامته المطبخ وهو طاير من الفرحة" باركي لي ياماما"
الأم"ألف مبروك ياحبيبي....بس علي أيه "
"أنا إتعينت معيد في الجامعة "
مامته حضنته وباسته وقعدت تزغرد" ألف مبروك ياحبيبي...عقبال ما أفرح بيك ...واجوزك..وأشيل ولادك"
دخل الاب علي صوت الزغاريد وبص لمراته وهشام
"هي الزغاريد دي عندنا"
الأم "مبروك ياأبو هشام....إبننا إتعين معيد في الجامعة "
باباه حضنه "الف مبروك ياحبيبي....شد حيلك يلا يادكتور
عشان نجوزك ...ونفرح بيك"
الأم" مش كده ياأبو هشام....أنا كنت لسة حالا بفاتحه في الموضوع ده ...قبل ما تدخل بثواني"
هشام "لسة بدري علي الموضوع ده ...أنا مبفكرش في الجواز الوقتي خالص " وسبهم ودخل أوضته....
قعد هشام علي سريره ...وسرح بخياله شوية ..وتمني لو كانت سهام جانبه الوقتي وتشاركه فرحته....ويمكن كانت تكون هي كمان إتعينت معيدة معاه... والفرحة تبقا فرحتين ..ما هي طول عمرها شاطرة زيه ...كل ده ودموعه نازلة من عينه....
وكل إما يفتكر إنها خانته واتجوزت غيره...وكسرت وعدها له...يمسح دموعه....ويمنع نفسه من التفكير فيها ....
...في الڤيلا...
بعد موت علاء ...سهام حست بفراغ كبير وخصوصاً إن تاليا كبرت ...وكانت عاوزة تملي الفراغ ده بأي حاجة...
قعدت مع نفسها وفكرت ...وفي يوم مامتها كانت بتزورها
خدتها وقعدت في أوضتها ...وعصام وتاليا بيلعبوا في الجنينة...
قربت سهام من مامتها "عاوزة أخد رأيك في حاجة ياماما"
"خير ياحبيبتي ...إتفضلي"
"أنا بقيت حاسة بملل كبيييير أوووي ياماما ..طول النهار قاعدة مبعملش حاجة....أيه رأيك ياماما أكمل دراستي
وأنتسب لكلية الطب...حلم عمري...يمكن أقدر أنسي الظروف الوحشة اللي مريت بها الفترة اللي فاتت"
الأم"اللي يريحك ياحبيبتي إعمليه....أهم حاجة تكوني مبسوطة"
"مبسووووطة ...مبسوطة أيه بس ياماما ...بعد ما كل حاجة حلوة في حياتي راحت مني !!!!"
طبطت الأم علي كتفها "قدر ربنا يابنتي...الحمد لله على كل شيء...ربنا يفرحنا بتاليا .... وعصام "
"يااارب ....ياماما"
"طب ياسهام يابنتي ..أنا هقوم أمشي بقا الوقتي ..يدوب علي ما اروح"
"ما إنتي قاعدة شوية ياماما"
"أنا قعدت كتير أهو يابنتي "
وقامت الأم خدت عصام وروحوا ..
تاني يوم الصبح سهام وتاليا وإبراهيم بيفطروا...
سهام "عاوزة أخذ رأيك في حاجة ياإبراهيم"
"خير يا سهام ....إتفضلي"
"أنا بفكر أنتسب لكلية الطب...أهو منها أحقق حلم عمري..ومن ناحية تانية أملي فراغلي ...وأحاول أنسي"
ٱبراهيم وهو مبتسم "خير ما عملتي ياسهام ...دي أحسن حاجة فكرتي فيها ...ربنا يوفقك يااارب...طب إنتي سألتي في الكلية ولا حاجة ...عشان لو كده تدخلي من أول السنة الجاية"
"لاء ..لسة مسألتش ...الفكرة جات في دماغي ...وكنت عاوزة أخد رأيك الاول"
"رأيي في أيه بس ياسهام...أنا عمري ما أعترض علي حاجة فيها مصلحتك ..إنتي أختي ياسهام...وأتمني لك كل خير...وكمان يلا قومي إلبسي بسرعة ...أوصلك في طريقي الكلية ...تسألي فيها ..أيه يخليكِ تستني لبكره"
"بجد ياإبراهيم "
"ودا فيه هزار ...يلا يادكتورة بسرعة ..قدامك ربع ساعة تكوني لبستي ..عشان منتأخرش"
جريت سهام علي أوضتها عشان تلبس هي وتاليا...وهي طايرة من الفرحة...
وراحت الكلية وسألت... وجابت موافقة من عميد الجامعة
وهتروح الكلية اول السنة....
بعد 3 شهور السنة الدراسية بدأت ...وسهام كانت فرحانة أوووي وهي راحة الكلية ...وبعد ما باص المدرسه خد تاليا
سهام ركبت مع إبراهيم ...يوصلها في طريقه....
دخلت سهام المدرج....وقعدت وسط البنات في أول بنچ..
وكانت زي القمر.....كانت لافتة نظر كل شباب المدرج..
وسنها مكنش باين خالص إنها أكبر من زميلاتها....
أول محاضرة ...دخل لهم معيد چنتل...شعره طويل ...وذقنه كثيفة قصيرة...وبعد ما قعد علي مكتبه
بيبص علي الدفعة بإبتسامة ..عينه جات في عين سهام
اللي كانت قاعدة في وشه...
وقفوا هما الإثنين ...مش مصدقين نفسهم...
وفي صوت واحد ...وكل واحد فيهم بيشاور علي التاني
"سهااااااااام" "هشاااااااااام"
وخرجت سهام جري من المدرج !!!!!
***#############***
**تغيير مسار**
**مها بركات**
ليست هناك تعليقات:
إرسال تعليق