الحلقة السادسة:
قام الأب قعد علي السرير وبكل حنية
"تعالي ساعديني يابنتي عشان أخرج لهم "...
"حاضر يابابا".أول ما الأب دخل الأنتريه لاقي مهندس فتحي في وشه بيبتسم له"إزيك ياراجل ياطيب..إنت مش فاكرني ولا أيه".
"إعذري التعب شالل تفكيري ..ومش مركز شوية".
"أنا ياسيدي إتعاملت معاك قبل كده من فترة طويلة،بس لسة لحد النهاردة فاكر طيبتك وذوقك معايا،ولما عرفت بتعبك ...جيت أزورك".
"أهلا وسهلاً نورت ...ومتشكر جدآ ".
دخلت إبتسام "إتفضلوا الشاي".
مهندس فتحي بكل سرور"شكرا يابنتي مكنش له لزوم".
"إزاي بس ياعمو....دا كفاية مجيتكم لحد هنا".
إبتسام بعد ما حطت الشاي"عن إذنكم...أنا هدخل أذاكر يابابا ولو إحتجت أي حاجة نادي عليا."
إبتسام كانت متوسطة الجمال ...بس كانت خفيفة الظل
لفتت بال مهندس فتحي وعلاء اللي قاعد ساكت منطقش كلمة...
مهندس فتحي "ربنا يحفظها لك ياحاج أحمد ،ويبارك في تربيتك...ماشاء الله بقت عروسة مشفتهاش من 10 سنين،
ألا قول لي هي عندها كم سنة الوقتي !!؟؟"
"20 سنة ..السنة دي آخر سنة لها في كلية تجارة ،عندها إمتحان بعد يومين ..ربنا يوفقها".
الحاج فتحي وعلاء في صوت واحد"اللهم اميييييييييين
نستأذن إحنا بقا".
"ما إنتوا قاعدين شوية .أنا لحقت أشبع من قعدتك يابشهندس زي زمان"..
"وقت تاني ..عشان ترتاح ..الجيات كتير ياراجل ياطيب" وإستأذن هو وابنه...
مهندس فتحي اول ما ركب العربية جنب علاء قرب منه
"أيه رأيك في إبتسام ياعلاء !!!"
علاء وهو مدربك "هي حلوووة وشكلها هادية ومؤدبة"
"أنا شخصياً ياإبني من ساعة ما شوفتها دخلت قلبي ولما باباها قال إنها في آخر سنةفي الكلية وأنا بفكر أول ما باباها يتحسن أروح أخطبها لك عشان أفرح بيك بقا ياعلاء"
علاء بكل أدب"اللي تشوفه يابابا".
مهندس فتحي بقا كل يوم يتصل بالحاج أحمد يطمن عليه...الحاج أحمد بعد العلاج الطبيعي والدوا إتحسن كتير..وبقا يسند علي عكاز وساب الكرسي خالص.البيت كله كان فرحان إنه مشي علي رجله تاني ..
بعد شهر من الامتحانات... إبتسام بتفكر إنها تنزل تدور علي شغل في أي شركة ...في الوقت ده راح مهندس فتحي للحاج أحمد وفي وسط الكلام قرب منه "أنا عاوز أفاتحك في موضوع كده ياحاج ..بس ياريت متكسفنيش"
"خير يابشمهندس"..
"صلي علي النبي ياحاج ..أنا مبحبش اللف والدوران...بص
أنا مش هلاقي حد في ذوقك وأخلاقك ولا في تربيتك لبناتك أناسبه !!! أنا طالب القرب منك في إبتسام لعلاء إبني"
ظهرت الفرحة علي وجه الحاج أحمد
"ياخبر ..وإحنا نطول.دا أنا أجيبها لكم خدامة."
"خدامة أيه بس ياحاج...إبتسام هتبقي زي بنتي"
"دا العشم برضو يابشمهندس."
"خلاص أسيبك أنا الوقتي ...شاور العروسة كده وإبقا رد عليا..عاوزين نفرح بقا بالولاد ياراجل ياطيب ".
"حاضر ...ربنا يقدم اللي فيه الخير ".
دخلت أم ٱبتسام لزوجها "خير ياحاج ..كان عاوز أيه مهندس فتحي !!!"
"مش هتصدقي كان عاوز أيه !!؟؟"
"خير ..طمني"
"كان جاي يطلب إيد إبتسام لإبنه علاء..مهندس برضو وشغال مع باباه في الشركة".
ظهرت الفرحة علي وجه الأم وقعدت تقول في سرها
"ربنا يجعله من نصيبك ياإبتسام يابنتي...عشان نفرح شوية".
أصحاب إبتسام رنوا التليفون ردت سهام
"ألووو..إبتسام موجودة"
"أيوه موجودة ..ثانية واحدة "
سهام بعلو صوتها"تعالي كلمي حد عاوزك ع التليفون يإبتسام"
"حاضر ..."
ردت إبتسام لقت صاحبتها بتقول لها النتيجة ظهرت الوقتي ..إلبسي وتعالي بسرعة نشوفها في الكلية"
"حاضر هعرف بابا وماما ..وهاجي حالاً".
إبتسام بعلو صوتها وهي مستعجلة"يابابا ...ياماما النتيجة بتاعتي ظهرت ..وانا راحة أشوفها في الكلية مع صحباتي"
الأم وهي فرحانة"ياما أنت كريم يارب ...روحي يابنتي
ربنا ينجحك ومتتأخريش ..وإبقي طمنينا"
"حاضر ياماما"وخرجت جري.
وصلت الكلية لقت النتيجة متعلقة وصحباتها أول ما شافوها جريوا عليها"إحنا كلنا نجحنا ياإبتسام وجبنا تقديرات كويسة ...ألف مبروك لنا كلنا...بس ياخسارة دي آخر سنة لنا مع بعض ومش هنشوف بعض تاني".
إبتسام وهي فرحانة"أهم حاجة إننا نجحنا..وأكيد هنبقا نتفق ونتقابل...أنا همشي الوقتي عشان أروح أطمن ماما وبابا".
"ماشي ياإبتسام ...إبقي خلينا نشوفك"
"إن شاء الله....يلا ... سلام ".
جريت إبتسام علي البيت فتحت لها سهام ...
إبتسام بعلو صوتها"ياماما... يابابا باركولي ..أنا نجحت بتقدير جيد جدا "
الأم والأب وهما فرحانين"مبروك يابنتي ...ربنا يفرحك دايماً ".
الأم بتمتم في سرها وبتبص لزوجها "يااارب الفرحة تبقا فرحتين ."
سهام خدت بالها وقربت من ماماتها "بتتغمزي مع بابا علي أيه ياماما ...فيه ايه "
قربت الأم منها أووي"مبروك ياحبيبتي متقدم لكي عريس.
أخيراً كبرتي وهشوفك عروسة ياإبتسام"
"عريس ....!!! مين ده ياماما !!! أنا أعرفه !!!؟؟؟؟
** ##################**
**تغيير مسار**
**مها بركات**
ليست هناك تعليقات:
إرسال تعليق