الحلقة السابعة:
الأم بكل سرور"أيوه إنتِ شوفتيه قبل كده ".
"ما تقولي هو مين بقا ياماما ".
"مهندس علاء إبن مهندس فتحي... أيه رأيك !!"
سهام وهي مكسوفة "اللي تشوفوه ياماما إنت وبابا"
خدتها الأم في حضنها"ألف مبروك ياحبيبتي "
يوم الخميس مهندس فتحي وإبنه علاء راحوا يطلبوا إيد إبتسام رسمي ويقرأو الفاتحة..
وعملوا خطوبة علي الضيق عشان ظروف تعب باباها..
كل ده وإبراهيم ميعرفش إن خطيبة أخوه تبقا أخت سهام زميلته ..ولما شافها في الخطوبة فرح أوي إنهم هيبقوا عيلة واحدة....
في يوم راح مهندس فتحي للحاج أحمد وقرب منه
"إحنا عاوزين نجوز الولاد بقا ونفرح بهم "
الحاج أحمد وهو متردد"إن شاء الله"فحس به مهندس فتحي
"بص ياحاج أحمد إحنا بقينا عيلة واحدة..ونتاقل إبتسام بالذهب ..وانا عارف ظروف تعبك والحالة المادية ..عشان كده أنا مش عاوز إبتسام غير بشنطة هدومها..وإحنا عندنا الڤيلا كاملة من كله.. عروستنا بس تختار يوم تنزل فيه مع خطيبها تختار أحلي وأشيك أوضة نوم لست العرايس ".
الحاج أحمد سهم ومكنش عارف يرد لما حس إنه مش قادر يجهز بنته ونزلت دمعة من عينه غصب عنه..
قام مهندس فتحي حضنه"إحنا عاوزين نفرح ياراجل ياطيب...ربنا ما يجيب دموع ...عرف عروستنا إن الفرح أول الشهر إن شاء الله ". وإستأذن ومشي..
بعد أسبوعين راحت سهام الكوافير مع أختها ..
إبتسام بفستان الفرح كانت زي القمر ...
وبعد 9 شهور بالضبط إبتسام وعلاء خلفوا بنوتة سموها
"تاليا" كانت قمر 14 زي خالتها سهام... البيتين كانوا فرحانين أوي بالقمر الصغير...
وعدت شهور الأجازة وسهام دخلت ثانوي عام مع هشام وإبراهيم ..هشام كان فرحان إنه هيشوف سهام كل يوم تاني...
ٱبراهيم دخل علمي رياضة ،،وسهام وهشام دخلوا علمي علوم...
سهام كانت كل إما تكبر تبقا زي القمر في عيون هشام ..
وفي ثالثة ثانوي هشام بيتكلم مع سهام"أخيراً بقينا في آخر سنة وندخل الكلية مع بعض ...وأكلم بابا وماما عنك وأجي أخطبك ..وأول ما نخلص جامعة نتجوز علي طول"
سهام لما سمعت الكلام ده خدودها إحمرت واتكسفت جدا وكل اللي قالته "يلا نروح ...عشان منتأخرش"وجاية تسرع مشيتها شدها هشام من إيدها بحنية وهمس لها
"مش هسيبك تمشي إلا لما تقولي إنك فرحانة زي ما انا فرحان عشان قربنا نتجمع مع بعض".
شدت سهام إيدها وهي مكسوفة"أنا قلت لك قبل كده إحنا لسة صغيرين علي الكلام ده "
"وأنا قلت لك قبل كده أنا مش صغير وشايفك أجمل عروسة ومش قادر أشوف ولا أحب غيرك ياسلطانة قلبي"
سهام كانت فرحانة جدا بحبه لها بس مكسوفة ومش عارفة تقول له أيه...
سهام ماشية جانبه وهي سرحانة في كلامه وكانت هتتكعبل برضو يدوب هشام لحقها وقرب من ودنها
" مالكِ يامسهراني ليالي ...هو أنا كل إما أتكلم معاكي في الموضوع ده تتكعبلي وتتكسفي "..
جت تشد إيدها ضغط عليها بحنية"طب قولي أي حاجة عشان خاطري ..وحياتي عندك ياسهام..ولا إنتِ مش بتحبيني زي ما بحبك"..
سهام وهي موطية في الأرض وبصوت هادي"إنت عارف حبي لك ياهشام وحاسس بمشاعري نحيتك وعارف برضو أني بتكسف من الكلام في المواضيع دي وإنت بتتعمد تحرجني"
"والله ما بحرجك ولا حاجة ...ياسهام إحنا واحد مفيش فرق بينا وربنا يعلم غلاوتك عندي وهتفضلي أختي لحد ما يجمعنا بيت واحد ...إرتحتي كده...عشان بس تعرفي إني فعلاً بحبك بجد"
بصت له سهام وهي طايرة من الفرح
"ربنا يخليك ليا..ويجمعنا علي خير"
"ربنا يخليكي إنتِ ليا ...ويقدرني وأسعدك ياسلطانة قلبي" وإبتسموا لبعض ودخلوا بيوتهم...
الامتحانات خلاص علي الأبواب والثلاثة بيذاكروا وبيجتهدوا عشان يحققوا حلمهم ...
وأول يوم إمتحان ...الثلاثة حلوا كويس .وكانوا كده كل
إمتحان.. وأخيراً بعد إمتحانات دامت شهر
خلصوا ...وقعدوا في بيوتهم منتظرين النتيجة....الأيام
بتمر ...والثلاثة قلقهم بيزيد علي النتيجة...
في نفس الوقت علاء وإبتسام كانوا مسافرين الغردقة بيقضوا أجازة الصيف وبيحتفلوا بعيد ميلاد "تاليا"التاني
وعلاء بيلعب معاها وبيحضنها ويبوسها "القمر بتاعي تمت السنتين "... وهيرجعوا بعد أسبوع تكون نتيجة سهام وإبراهيم ظهرت ويفسحوهم بمناسبة نجاحهم ..
النتيجة ظهرت.. والثلاثة راحوا المدرسة يشوفوا النتيجة.
إبراهيم جاب 95 في المائة وكان فرحان أوي إنه خلاص هيدخل هندسة ويحقق حلمه
سهام جابت 98في المائة وهشام 97في المائة برضو هيدخلوا طب مع بعض وكانوا فرحانين جدآ...
بس سهام مش مكتوب لها تفرح كتير...رجعت البيت أول ما مامتها فتحت لها الباب "باركي لي ياماما أنا نجحت ومجموعي هيدخلني طب "
الأم قعدت تحضنها وتبوسها "ألف مبروك ياحبيبتي..ولا أقول لك بقا يادكتورة "
الأب "ألف مبروك ياحبيبة بابا .. دايماً رافعة رأسي"
وكانوا طايرين من الفرحة ...
الأم "أتصلي ياسهام بإختك عرفيها ...دي هتفرح أوووي ..دي عمالة تتصل تسأل عليكي أول ما عرفت إن النتيجة ظهرت "
سهام وهي فرحانة"حاضر ياماما"وجريت ع التليفون..
"ألوووو...باركي لي ياإبتسام أنا نجحت وهدخل طب"
"ألف مبروك ياحبيبتي... ...ابراهيم كمان هيدخل هندسة ...ربنا يوفقكم..."
"انتوا راجعين إمتي ياإبتسام ..تاليا وحشتني أوووي"
"إحنا جايين بكرة الصبح إن شاء الله عشان نحتفل بنجاحك إنت وإبراهيم بالليل"
"تيجوا بالسلامة ياحبيبتي"وقفلوا السكة ..
تاني يوم علاء سايق العربية وإبتسام قاعدة جانبه وتاليا علي رجلها...تاليا بتشد إيد باباها عشان يبص لها ويلعبها..يدوب بيبص لها ...جت عربية مخالفة سريعة خبطتهم وقلبت العربية ...
الإسعاف جت بسرعة ونقلتهم المستشفي وحالتهم صعبة جدا..
أول ما وصلوا المستشفي موظف هناك مسك موبيل علاء عشان يتصلوا بحد من أهلهم ولحسن الحظ كان آخر إتصال بين علاء وباباه ...فرنوا عليه
مهندس فتحي رد"ألوووو...مين معايا"
"دا بيت علاء فتحي "
"أيوه ..مين حضرتك ...أنا مهندس فتحي باباه"
"للأسف يابشمهندس إبنك علاء ومراته وبنته عملوا حادثة
وهما عندنا في مستشفي الجزيرة"
السماعة وقعت من إيد مهندس فتحي وكان هيقع علي الأرض من الصدمة ..إبراهيم كان نازل من علي السلم شافه جري عليه "مالك يابابا ....!!؟؟؟"
مهندس فتحي وهو مش قادر يأخذ نفسه "أخوك عمل حادثة هو ومراته ونقلوهم المستشفي ...إتصل بسرعة بحد من بيت مرات أخوك عرفهم ..."
"حاضر يابابا"وجري علي التليفون
ردت سهام "ألووو ياإبراهيم ...إبتسام وعلاء رجعوا من السفر..."
إبراهيم معرفش يرد وسكت شوية
سهام "ألوووو ياإبراهيم ...إنت مش سامعني ولا ايه"
"لاء سامعك ...أومال مبتردش ليه "
"أصل...."
"أصل أيه ياإبراهيم قلقتني ...خير فيه أيه"
"العربية إتقلبت بعلاء وإبتسام وهما راجعين ونقلوهم مستشفي الجزيرة..إحنا بتتصل بكم عشان تيجوا معانا"
أول ما سهام سمعت الخبر وقعت علي الارض...مامتها جريت عليها
"سهاااام....مالك ياحبيبتي ...مين اللي كان علي التليفون؟؟؟ !!"
سهام وهي بتعيط "إبتسام ياماما...."
"مالها إبتسام ....أختك مالها ...ردي عليا قلقتيني"
"إبتسام عملت حادثة ياماما"
الأم وهي مصدومة "حااااادثة....بنتي ....ياحبيبتي يابنتي"
#################
**تغيير مسار**
**مها بركات**
ليست هناك تعليقات:
إرسال تعليق